ભગવાનની ઓળખ

ભગવાન એ એક વિશેષણ છે. જેમ ભાગ્યશાળી માણસને ભાગ્યવાન કહેવાય, પૈસાવાળી વ્યક્તિને ધનવાન કહેવાય, જ્ઞાનવાળી વ્યક્તિને જ્ઞાનવાન કહેવાય, તેમ જેમનામાં ભગવદ્ ગુણો પ્રગટ થાય તેમને ભગવાન કહેવાય.

મનુષ્યો ભગવાનની કેટકેટલી ભક્તિ, પૂજાપાઠ અને ક્રિયાઓ કરે, તોય તેમની ચિંતા કે ઉપાધિ જતી નથી. ભક્તને ઝંખના રહ્યા કરે છે કે ભગવાનનો ભેટો થાય, પણ ભગવાન ભેગા થતા નથી. ભગવાનની સાચી વ્યાખ્યા જાણ્યા વગર, તેમની ઓળખાણ વગર શોધવા નીકળી પડે છે.

વાસ્તવિકતામાં, ભગવાનનો ભેટો થવા માટે તેમનું સાચું સ્વરૂપ જાણવું પડે, ઓળખવું પડે.

મોટેભાગે આપણે ભગવાનને જે રીતે ભજીએ છીએ, એ તેમને ઓળખ્યા વગરની પરોક્ષ ભજના છે. જેમ, આપણે ગમે તેટલા કાગળ લખીએ પણ જો સાચું સરનામું જ ના ખબર હોય, તો કાગળ પહોંચે નહીં. એટલે સાચી ભજના તો ભગવાનની પ્રત્યક્ષ ઓળખાણ થાય પછી થાય.

શું ખરેખર ભગવાન છે? છે તો ક્યાં રહે છે? શું કરે છે? આ દુનિયા ભગવાન ચલાવે છે? તેમનો ભેટો કઈ રીતે થાય? ભગવાનની ઓળખ આપતા ગુણો કયા છે? ભગવાનની ભજના કઈ રીતે કરવી? એવી તમામ સમજણ થકી ભગવાનની સાચી ઓળખાણ આપણને અહીં પ્રાપ્ત થાય છે.

ભગવાન મૂળ પુરૂષોની દ્રષ્ટિએ

બધા ભગવાને એમ જ કહ્યું કે, 'આત્માને ઓળખો, તમામ દુ:ખોથી છુટો અને મોક્ષે ચાલ્યા જાવ'. જ્ઞાનીઓ પણ આજે એજ રસ્તો બતાવી રહ્યા છે કે તમારી મહીં ભગવાન ખરા સ્વરૂપે છે.

Spiritual Quotes

ગોડ ઈઝ ઈન એવરી ક્રીએચર વ્હેધર વિઝિબલ ઓર ઈન્વિઝિબલ. (ભગવાન દરેક જીવ માત્રમાં છે, પછી તે આંખે દેખાય એવા કે ન દેખાય એવા હોય) તમારી ને મારી વચ્ચે દૂરબીનથીય ન જોઈ શકાય એવા અનંત જીવો છે.
જો ભગવાન ઉપરી હોય અને તે જો મોક્ષે લઈ જનાર હોય, તો તો એ જ્યારે કહે કે અહીંથી ઊઠ, તો તમારે તરત જ ઊઠવું પડે. તેને મોક્ષ શી રીતે કહેવાય? મોક્ષ એટલે સંપૂર્ણ સ્વતંત્ર. કોઈ ઉપરી નહીં અને કોઈ અંડરહેન્ડ પણ નહીં.
આ દેહ તો (પેકીંગ) ખોખું છે. મહીં બેઠા છે તે ભગવાન છે.
પુરુષ તો કોનું નામ કહેવાય? ક્રોધ-માન-માયા-લોભ એ નિર્બળતા જેને ના હોય, એને ભગવાને 'પુરુષ' કહ્યા.
જેનામાં 'હુંકાર' ગયો હોય ને, ત્યાં પછી એ જ ભગવાન! જો કદી વધારે દર્શન કરવા જેવું પદ હોય તો આ એકલું જ કે જેનો 'હુંકાર' ગયો હોય, પોતાપણું ગયું હોય. જ્યાં પોતાપણું ગયું ત્યાં બધું સર્વસ્વ ગયું.
તું જ તારો ઉપરી, તારો રક્ષક પણ તું જ ને તારો ભક્ષક પણ તું જ. યુ આર હોલ એન્ડ સોલ રિસ્પોન્સિબલ ફોર યોરસેલ્ફ. પોતે જ પોતાનો ઉપરી છે. આમાં બીજો કોઈ બાપોય આંગળી ઘાલતો નથી. આપણો બોસ છે તેય આપણી ભૂલથી ને અન્ડરહેન્ડ છે તેય આપણી ભૂલથી જ છે. માટે ભૂલ ભાંગવી પડશે ને?
'તારો ઉપરી વર્લ્ડમાં કોઈ નથી. તારાં ઉપરી તારાં બ્લંડર્સ અને તારી મિસ્ટેકો છે. એ બે નહીં હોય તો તું પરમાત્મા જ છે.'
ભગવાન તો તમારું સ્વરૂપ છે. તમારો કોઈ ઉપરી જ નથી, કોઈ બાપોય ઉપરી નથી.
ભગવાન જીવમાત્રની અંદર બેઠેલા છે, ચેતનરૂપે. એનું ભાન જ નથી. એ ચેતન એ જ પરમેશ્વર છે! 'શુદ્ધ ચેતન' એટલે શુદ્ધાત્મા, એ જ પરમાત્મા!
ભગવાનને ત્યાં તો એટલું જ છે કે ‘કોઈ જીવને દુઃખ ન થાય, એ જ અમારી આજ્ઞા છે.
મૂર્તિ શાથી મૂકી છે? એની પાછળ શી ભાવના છે ? ‘સાહેબ, તમે સનાતન સુખવાળા છો ને હું તો ‘ટેમ્પરરી’ સુખવાળો છું. મારેય સનાતન સુખની ઇચ્છા છે.’ ભગવાન સનાતન સુખવાળા છે, તેથી તો જુઓને મૂર્તિમાં છે તોય આપણા કરતાં રૂપાળા દેખાય છે. જાણે જોયા જ કરીએ!
આપણે ભગવાનની મૂર્તિનાં દર્શન કરીએ છીએ ત્યારે મૂર્તિ શું કરે છે? ‘ભાઈ, આ માલ મારો નથી, આ માલ તારા જ શુદ્ધાત્માનો છે.’ એટલે મૂર્તિ તમારા શુદ્ધાત્માને પાછું મોકલી આપે છે. આને પરોક્ષ ભક્તિ કહેવાય!
માતાજી કોને પ્રગટ થાય? સહજ સ્વભાવી થઈ જાય તેને. આ મન-વચન-કાયા સહજ સમાધિ સ્વરૂપ થઈ જાય ત્યારે માતાજી આવ્યાં કહેવાય. આદ્યશક્તિ ઉત્પન્ન થઈ કહેવાય.
જો જગત ભગવાને બનાવ્યું હોય તો ભગવાનને કોણે બનાવ્યો? અને એને પાછો કોણે બનાવ્યો?.....
જો ભગવાન કર્તા હોય તો પછી તમારી કશી જવાબદારી રહે ? ના રહે. ભગવાને ય કર્તા નથી ને તમે ય કર્તા નથી. 'વ્યવસ્થિત' કર્તા છે.
શું ભગવાન નથી? છે. એનું સાચું 'એડ્રેસ' શું? કઈ પોળમાં રહે છે ? ઉપર ? ઉપર તો કોઈ બાપોય રહેતો નથી. 'હું' બધે ફરી આવ્યો છું. ભગવાનનું સાચું 'એડ્રેસ' તો, God is in every creature whether, visible or invisible. God is in creature not in creation.
ભગવાન કોણ છે? જે દેહ હોવા છતાં દેહના માલિક નથી, મનના માલિક નથી, વાણીના માલિક નથી, કોઈ ચીજના માલિક નથી, તે આ જગતમાં ભગવાન છે!
આ તમે જેટલું જુઓ છો, વાંચો છો, સાંભળો છો, એ બધુંય કલ્પિત છે. ભગવાન બુદ્ધિથી અગમ્ય છે અને જગત બુદ્ધિથી જુએ છે. તે કેમનો મેળ ખાય?