ચિંતામુક્ત કેમ થવું: સ્ટ્રેસ (તણાવ) અને એન્ક્ઝાયટી સામે પ્રેક્ટિકલ ઉપાયો

સંસારમાં કોઈ મનુષ્ય એવો નહીં હોય જેને ચિંતા કે ટેન્શન ના થતા હોય.

ભણવાની ચિંતા, પરીક્ષા કે ઈન્ટરવ્યુમાં પાસ થવાની ચિંતા, નોકરીમાં પ્રમોશનની ને ધંધામાં પ્રોફિટની ચિંતા, બાળકોના ખર્ચની ચિંતા, મોટા થાય તો તેમને પરણાવવાની ચિંતા, તબિયતની ચિંતા એમ કંઈ કેટલીય આર્થિક, કૌટુંબિક ને સામાજિક ચિંતામાં મનુષ્યો ફસાયેલા રહે છે.

ચિંતા કરવી કોઈને ગમતી નથી, તોયે ચિંતા વગરનો એક દિવસ જવો મુશ્કેલ છે. પણ જો સાચું જ્ઞાન મળે તો ચિંતા ગાયબ થઈ શકે છે!

તબીબી વિજ્ઞાનની ભાષામાં ચિંતાને એક બીમારી કે નબળાઈ ગણવામાં આવે છે. પણ ફક્ત અહીં જ “ચિંતા એ અહંકાર છે!” – આ ગૂઢ રહસ્ય પરમ પૂજ્ય દાદા ભગવાન થકી ખુલ્લું થાય છે.

તબીબી વિજ્ઞાનમાં ચિંતાના માનસિક અને શારીરિક કારણો, તેના લક્ષણો અને ઉપચારોની વાત સહેલાઈથી મળે છે. પણ ચિંતાનું ધોરીમૂળ શું છે? તે કઈ રીતે રોજિંદા જીવનમાં ભાગ ભજવે છે? તેને ઓળખવી કઈ રીતે? તેનું રહસ્ય સમજાય તો ઘણુંખરું પોતે જ ચિંતામાંથી બહાર નીકળી શકે છે.

અહીં આપણને આવા વણઉકલ્યા પ્રશ્નોના પ્રેક્ટિકલ ઉદાહરણો સહિત સમાધાન મળે છે. તેમજ ચિંતામાંથી નીકળવાના સચોટ ઉપાયોની સમજણ ખુલ્લી થાય છે.

શું તમે ખૂબ ચિંતા કરો છો?

શું તમે ખૂબ ચિંતા કરો છો? તમે ક્યારેય વિચાર્યું છે કે ચિંતાઓ તમે પોતે ઊભી કરેલી છે કે હકીકતમાં છે? ચિંતા કરવાથી ફક્ત પરિસ્થિતિ વધુ બગડશે, એનું નિરાકરણ નહીં આવે. તો ચિંતા શા માટે?

Spiritual Quotes

ચિંતા તો એક જાતનો અહંકાર કહેવાય છે.
જ્યારે ચિંતા થવા માંડે કે સમજો કે કાર્ય બગડવાનું વધારે. અને જ્યારે ચિંતા ના થાય તો સમજવું કે કાર્ય સ્વયં સુધરી જશે !
ચિંતા બંધ થાય ત્યારથી જ વીતરાગ ભગવાનનો મોક્ષમાર્ગ કહેવાય !
એવી પરિસ્થિતના સામા થજો, ઉપાય કરજો, પણ ચિંતા ના કરશો.
પ્રાપ્તને ભોગવો, અપ્રાપ્તની ચિંતા ના કરો.
વિચાર કરવાનો અધિકાર છે, કે ભઈ આટલે સુધી વિચાર કરવાનો, અને વિચાર જ્યારે ચિંતામાં પરિણામ પામે એટલે બંધ કરી દેવું જોઈએ.
આત્મજ્ઞાન વિના ચિંતા જાય નહીં.
કાળજી અને ચિંતામાં બહુ ફેર. કાળજી એ જાગૃતિ છે અને ચિંતા એટલે જીવ બળ્યા કરવો.
ઘડી પહેલાં થઈ ગયું, તેની ચિંતા શું ? જેનો ઉપાય નથી, તેની ચિંતા શું ? કોઈ પણ બુદ્ધિશાળી સમજે કે હવે ઉપાય નથી રહ્યો, માટે એની ચિંતા કરવાની ના હોય.
આ એક જ ડિપાર્ટમેન્ટની ઉપાધિ હોય, તે બીજા ડિપાર્ટમેન્ટમાં ના લઈ જવી. એક ડિવિઝનમાં જઈએ ત્યારે તે પૂરતું બધું સંપૂર્ણ કામ કરી લેવું.
જે ચિંતા કરે છે, એ ભગવાનને માનતો નથી અને ભગવાનને માને છે, તે ચિંતા ના કરે.
એક ફેરો કઢાપો-અજંપો કરે એટલે ભગવાન કહે છે કે આને તો મારી પડી જ નથી, ચિંતા પોતાના માથે લઈ લે છે, તો કરવા દો એને નિરાંતે ચિંતા!
ચિંતા એ સમજણને નાશ કરનારી વસ્તુ છે.
ચિંતા થવા માંડે તો સમજજો કે કાર્ય બગડવાનું છે ને ચિંતા ના થાય તો સમજજો કે બગડવાનું નથી. ચિંતા એ કાર્યને અવરોધક છે !
ચિંતા એ સંસારનું મોટામાં મોટું બીજ છે. કારણ કે ચિંતા એ મોટામાં મોટો અહંકાર છે. અહંકાર ગયો તો ચિંતા ગઈ.
ચિંતા એ મોટામાં મોટું અભિમાન છે. એટલે કુદરત એને બહુ મોટો દંડ આપે છે. ભગવાનને ગાળો દે એના કરતાં ચિંતા કરનારને વધારે દંડ છે. જે કામ બીજો કરે છે તેની તું ચિંતા કરે છે ? આ કુદરત કરતાંય તું મોટો ?
ઘરમાં એક માણસ ચિંતાના વિચારોમાં હોય તો બીજા બધા ઉપર સામસામી અસરો પડ્યા કરે અને ચિંતામુક્ત થઈ ગયો તો ?!
ચિંતા થવાની જગ્યાએ નિશ્ચિંત રહી શકે તે એનું નામ 'વિજ્ઞાન' કહેવાય! અને આપણા લોકો તો 'ઇઝી ચેર’ ઉપર બેસે ને 'અન્ઇઝી' દેખાય છે!
જેનો ઉપાય નથી, તેની ચિંતા શી ? મરણનો ઉપાય નથી, તેથી તેની કોઈ ચિંતા કરે છે ?
જ્યાં ધર્મ છે ત્યાં ચિંતા નથી અને જ્યાં ચિંતા છે ત્યાં ધર્મ નથી.