વીતરાગોની તત્ત્વ દ્રષ્ટિ

"બીજાનો દોષ જોવાથી કર્મ બંધાય, પોતાના દોષ જોવાથી કર્મમાંથી છૂટાય." આ છે કર્મનો સિદ્ધાંત.

મોટામાં મોટો મૂળ દોષ 'પોતાના સ્વરૂપનું અજ્ઞાન' એ જ છે! 'હું કોણ છું?' આટલુંજ નહીં સમજાવું, એ જ સર્વ ભૂલોનું મૂળ છે.

જ્ઞાની પુરુષની કૃપાથી 'એ' ભૂલ ભાંગે પછી બધી ભૂલો ભાંગવા માંડે.

અજ્ઞાનતામાં બીજાના જ દોષ જુએ, પોતાના દેખાય જ નહીં.

જ્યારે 'સ્વરૂપના જ્ઞાન'ની પ્રાપ્તિ પછી તમે નિષ્પક્ષપાતી થયા, મન-વચન-કાયા પર તમને પક્ષપાત ના રહ્યો. તેથી પોતાની ભૂલો તમને પોતાને દેખાય.

નિર્દોષ દ્રષ્ટિ

નિર્દોષ દ્રષ્ટિ એટલે કોઈ દોષિત નથી, મારું જ કરેલું મને ફળ આવે છે. જેમ પહાડ પરથી કાંકરો પડીને વાગ્યો તો કોઈને ગુનેગાર ગણતા નથી, તેમ જીવતા માણસોથી આપણને કંઈ વાગ્યું તોય વાંક કાઢવો નહી એનું નામ નિર્દોષ દ્રષ્ટિ. નિર્દોષ જોવાની દ્રષ્ટિ મેળવો પૂજ્ય દીપકભાઈ દ્વારા.

Spiritual Quotes

તમારી ભૂલો જ તમારી ઉપરી છે બસ, આપણી ભૂલો હોય તે જ!
ભૂલો ને બ્લંડર્સ!!! એટલે તમારી ભૂલ નહીં હોય તો કોઈ નામ દેનારુંય નથી આ વર્લ્ડમાં.
ભૂલને ભાંગવા માટે ભૂલને ભૂલ કહેવી પડે. તેનું ઉપરાણું ના લેવાય.
આ જગતમાં કોઈ દોષિત છે જ નહીં. તમને દોષ દેખાય છે એ તમારી જોવાની દ્રષ્ટિમાં ફેર છે.
આ જગતમાં કોઈ માણસ કોઈનું કશું કરી શકે જ નહીં, એવું આ સ્વતંત્ર જગત છે.
કોઈનો દોષ દેખાયો ત્યાં સુધી દુઃખ રહે. બીજાના દોષ દેખાતા બંધ થયા એટલે છૂટકારો.
નિજદોષ જોવાની દ્રષ્ટિ ઉત્પન્ન થઈ ગઈ એટલે પરમાત્મા થવાની તૈયારી થઈ.
ભૂલ વગરનું જ્ઞાન અને ભૂલ વગરની સમજણ થશે તો તું પોતે જ મોક્ષ સ્વરૂપ છે.
જગત આખું નિર્દોષ છે. દોષિત દેખાય છે, તે તમારા દોષે કરીને દેખાય છે. બાકી જગત દોષિત છે જ નહીં. અને તે તમારી બુદ્ધિ દોષિત દેખાડે છે કે, આણે ખોટું કર્યું.
જ્યાં સુધી જગત દોષિત દેખાશે ત્યાં સુધી ભટક ભટક કરવાનું થશે અને જ્યારે જગત નિર્દોષ દેખાશે ત્યારે આપણો છૂટકારો થશે.
જગત સંપૂર્ણ નિર્દોષ દેખાયું, તે સર્વસ્વ થઈ ગયો!
સંસાર એટલે રાગ-દ્વેષવાળી દૃષ્ટિ ને વીતરાગ દૃષ્ટિથી મોક્ષ. વીતરાગ દૃષ્ટિનું માપ શું? જગત આખું નિર્દોષ દેખાય તે.
વીતરાગોએ જગત નિર્દોષ શા આધારે જોયું? કારણ બધાં કર્મોને આધીન છે તેથી.
છેલ્લા પ્રકારની જાગૃતિ કઈ કે આ જગતમાં કોઈ દોષિત જ ના દેખાય!
જ્યાં સુધી પોતાની ભૂલો ના દેખાય ત્યાં સુધી ભગવાન ના થવાય.
ભૂલ દેખાઈ ક્યારે કહેવાય કે ફરી ના થાય ત્યારે.
પોતાના ગુના દેખાય તે 'સમ્યક્ દ્રષ્ટિ' અને પારકાના ગુના દેખાય તે 'મિથ્યા દ્રષ્ટિ'.
જેને પોતાના દોષ જોવા છે, સામાના જોવા નથી, તેનું આ જગતમાં કોઈ નામ લેનાર નથી.
તમારી પાસે નિર્દોષ દ્રષ્ટિ હોય તો તેનાથી તમે જુઓ. નહીં તો બીજું કશું જોશો જ નહીં. બીજું જોશો તો માર્યા જશો. જેવું જોશો તેવા થઈ જશો!
વીતરાગોએ જગત નિર્દોષ જોયું. તે વળી દોષ કાઢનારા આપણે કોણ ડાહ્યા પાછા?! ભગવાન કરતાં ય ડાહ્યા?!!
વીતરાગોએ જગત નિર્દોષ શા આધારે જોયું? કારણ બધાં કર્મોને આધીન છે તેથી.
પોતાની ભૂલો દેખે એ પરમાત્મા થઈ શકે!
દ્રષ્ટિદોષ છે, તેના જ ઝઘડાં ને મતભેદ છે.
જગતના દોષ કાઢે, ત્યાં સુધી એક અક્ષરેય આત્માનો જડે નહીં. નિજદોષ દેખે એ જ આત્મા!
જ્યારે પોતે પોતાના દોષ દેખે ત્યારે સ્વયંજ્યોતિ સુખધામ થાય!
જ્યારે પોતે પોતાના દોષ જોશે, ત્યારે બીજાના દોષ જોવાની નવરાશ નહીં રહે!
સ્વદોષ અને સ્વકલ્પનાથી ઊભું થયું છે આ બધું!
કોઈનીય ખોડ કાઢવા જેવું આ જગત નથી. ખોડ કાઢી એટલે બંધાયા.
આપણે ભૂલ વગરના થઈ જવું, તેથી માથે ઉપરી કોઈ ના રહે.
બીજાની ભૂલો જોવી એ તો ભયંકર ભૂલ છે!
સામાને ખરાબ કહેવાથી કે ખરાબ જોવાથી પોતે જ ખરાબ થઈ જાય છે. લોક સારા દેખાશે ત્યારે પોતે સારો થશે.