દેવું થવાથી થતી આત્મહત્યા કઈ રીતે અટકાવવી?

કેટલાક લોકો વધુ પડતા દેવામાં ડૂબી ગયા હોય, કે બિઝનેસમાં મોટી ખોટ આવી હોય ત્યારે પૈસા પાછા નહીં આપી શકવાના ભયથી આપઘાત કરવાનું વિચારે છે.

એવા સમયે પૈસા પાછા આપી દેવાના પ્રયત્નો કરવા. દેવું ખૂબ વધી ગયું હોય અને પૈસા પાછા ન આપી શકાય એવું હોય ત્યારે આપણી ભાવનામાં “મારે પૈસા પાછા આપી જ દેવા છે.” એમ રાખવું પણ અવળું પગલું તો ન જ ભરવું.

આપણે તપાસ કરવી કે આર્થિક મુશ્કેલી આવી છે પણ ઘરમાં ખાવા-પીવા-રહેવાની સગવડ તો છે ને? એટલું હોય તો બહુ થયું, એમ કરીને ઈશ્વરને સોંપી દેવું જેથી આપણને શાંતિ થઈ જાય.

ખરાબ પરિસ્થિતિમાં મનુષ્ય આર્તધ્યાન-રૌદ્રધ્યાન, દ્વેષ, અભાવ, તિરસ્કાર, વેર એમ ખૂબ ખરાબ કર્મો બાંધી શકે. “દેવું પૂરું નહીં થાય તો શું થશે?”, “આ ભાઈએ દગો દીધો”, “આ લોકો આવા છે” એમ નેગેટિવ વિચારોથી ગુણાકાર કર કર કરે તો બાવીસ વર્ષ પછી પણ દેવું પૂરું ના થાય. ઉપરથી વ્યક્તિ ડિપ્રેસ થઈ જાય, ભાંગી પડે ને કેટલાક તો આપઘાત કરી બેસે, જેનાથી લક્ષ્મી આવવાના અંતરાય વધે.

ઘણા લોકો ધંધામાં મુશ્કેલી આવે તો જુદી જુદી જગ્યાએથી લોન લીધા કરે. એક ખોટ જાય એટલે ઊંચા વ્યાજના દરે બીજી લોન લે. બીજી ખોટ જાય તો વધારે દરે ત્રીજી લોન લે. એમ કરતાં કરતાં દોઢ લાખનું દેવું વધીને દોઢ કરોડનું થઈ જાય, પછી મરવાના વિચારો કરે. એવા સમયે સમજવું કે આપણો પાપકર્મનો ઉદય ચાલે છે, ત્યારે ઉધામા નાખવાને બદલે સંકોચાઈને સમય કાઢી નાખવો. જેમ આપણે અડધી રાતના ધંધામાં દોડધામ ન કરીએ તેમ પાપના ઉદયમાં પણ ધીરજ પકડવી.

આપણે ભાવ ચોખ્ખો રાખવો, કે “પાંચ લાખનું દેવું થઈ ગયું છે, પણ મારે પૈસેપૈસો ચૂકવી દેવો છે.” ત્યારે અંદરખાને લાલચ ના રાખવી. દિલમાં સો ટકા ચોખ્ખી ભાવના રાખીને પ્રાર્થના કરવી કે “પૈસા આવી જાય તો બધા ચૂકવી દઉં”, જેનાથી સામાનેય શાંતિ થશે અને આપણા જીવનમાં પણ શાંતિ થઈ જશે.

આપણે એવી ધારણા કરીએ કે ધંધામાં વીસ લાખનો નફો થવો જોઈએ, તો પછી તરત અંદર વાળી લેવું કે વીસનો નફો પણ થાય અને વીસની ખોટ પણ જાય, જે બન્યું તે કરેક્ટ. પછી સત્તર લાખનો નફો થાય તો પણ કરેક્ટ અને સાત લાખનો થાય તો પણ કરેક્ટ. એવી માનસિક તૈયારી રાખવી પછી નફો નથી થતો, નથી થતો, એમ વિચારીને ડિપ્રેશનમાં જવાની જરૂર નથી.

ધંધામાં ફોન ઉપર સોદો મંજૂર કર્યો હોય અને બે દિવસ પછી સામો માણસ ફરી જાય તો આપણને ઉદ્વેગ થાય, ફ્રસ્ટ્રેશન આવે કે “મારે નફો જતો રહ્યો!” પણ નફો આવ્યો જ નહોતો, હજુ તો સોદો થયો હતો. તે વખતે સોદો જ નથી થયો એમ માનીને ચાલીએ તો આપણને ઉદ્વેગ ના થાય. આ તો ધંધાની એક ખોટ ખાઈએ ને ઉપરથી ઈમોશનલ થઈને આપણે બીજી ખોટ ખાઈએ છીએ, ને ઉપરથી નવા કર્મો બાંધીએ છીએ.

એટલે જ્યાં જ્યાં પણ આપણે કોઈ ધારણા બાંધી હોય અને ત્યાં કંઈક આપણી ધારણાથી ઊંધું થાય ત્યાં આ પ્રકારની સમજણ ગોઠવીને સોલ્યુશન લાવવું.

પરમ પૂજ્ય દાદાશ્રી આપઘાતના જોખમો તરફ અંગૂલીનિર્દેશ કરીને દેવું થાય ત્યારે આપઘાત ન કરવાનું સમજાવે છે.

પ્રશ્નકર્તા: આપઘાત કરીને મરી જાય તો શું થાય?

દાદાશ્રી: આપઘાત કરીને મરી જાય, પણ પાછું ફરી અહીં ફરજો ચૂકવવા આવવું પડે. મનુષ્ય છે તે તેને માથે દુઃખ તો આવે, પણ તે માટે કંઈ આપઘાત કરાય? આપઘાતના ફળ બહુ કડવા છે. ભગવાને તેની ના પાડેલી છે, બહુ ખરાબ ફળ આવે. આપઘાત કરવાનો તો વિચારેય ના કરાય. આ જે કંઈ કરજ હોય તો તે પાછું આપી દેવાની ભાવના કરવાની હોય, પણ આપઘાત ના કરાય.

આધ્યાત્મિક દૃષ્ટિથી જોઈએ તો આ દેવું એ પૂર્વકર્મનું ફળ છે. પાછું ચૂકવી દેવાના ભાવ એ બીજ છે. આપણે ફળ ન સુધારી શકીએ તો બીજ ચોક્કસ સુધારી લેવા. પણ આપઘાત જેવું કૃત્ય કરીને આ ભવ ને આવતો ભવ બંને ન બગાડવા.

કર્મોનું ફળ ભોગવવામાં ભગવાન મહાવીર કે રામ ભગવાન કે શ્રીકૃષ્ણ ભગવાન પણ કોઈ ફેરફાર કરી નહોતા શક્યા. આપણે પણ ખરાબ કર્મો અટકાવી નહીં શકીએ. પણ દુઃખની પરિસ્થિતિમાં સમતા રાખવી એ મોટામાં મોટી શૂરવીરતા કહેવાય છે, જેનાથી આ ભવ અને આવતો ભવ બંને અવશ્ય સુધરી જશે.

આર્થિક પરિસ્થિતિ નબળી થાય ત્યારે ત્યારે ધર્મમાં સમય વધારે આપવો. સત્સંગમાં જવું, ભગવાનની ભક્તિ-આરતી કરવા, ધાર્મિક પુસ્તકોનું વાંચન કરવું. એમ કરતા કરતા ખરાબ સમય પૂરો થશે અને પછી સવળા સંજોગની શરૂઆત થશે. પછી થોડી મહેનતમાં જ સવળું પરિણામ મળવા માંડશે.

તેમ છતાં ઘણીવાર સંજોગો સુધરે નહીં એવું પણ બને. કારણ કે જામી ગયેલું કર્મ હોય અને લક્ષ્મીના બાર વર્ષના અંતરાય હોય તો બાર વરસે જ પૂરા થાય. પણ તે સમયે સમતા રાખવી એ આપણા હાથમાં છે. તેનાથી ખરાબ સમય નીકળી જશે અને આવતા ભવનું બીજ સુધરશે.

મુશ્કેલી આવે ત્યારે જેમ તેમ કરીને ધીરજ પકડી રાખવી અને સ્થિરતા રાખવી. ધીમે ધીમે કામકાજ, નોકરી-ધંધા કે ભણતર બધું પૂરું કરતાં કરતાં ખરાબ સમય નીકળી જશે અને પાછો સારો સમય આવશે. માટે સમતા રાખીને મુશ્કેલીના સમયમાં ઉપાય કર્યા કરવો. સમય આવતાં સંજોગ મળશે અને રસ્તા નીકળ્યા કરશે, એવો કુદરતી નિયમ છે. ખાવા-પીવા અને રહેવાનું પણ કુદરતી નિયમથી મળી રહેશે. માટે, ખરાબ ટાઈમ આવ્યો હોય ત્યારે ખરાબ પગલું ભરવું નથી એમ નક્કી કરવું. જે ભગવાનમાં શ્રદ્ધા હોય તેમનું નામ લઈને ખરાબ સમય કાઢી નાખવો.

દેવું થવાથી થતી આત્મહત્યા કઈ રીતે અટકાવવી?

ક્વિક લીંકસ

મીડિયા

અન્ય સાઈટ