જીવનનાં મુશ્કેલ સમયમાં, કંટાળીને આત્મહત્યા કરવાનું મન થાય ત્યારે શું કરવું?
જીવન દરમિયાન, આપણે સારા અને નરસા એવા બે ચક્રમાંથી પસાર થઈએ છીએ પણ કેટલાક લોકો એવું તારણ કાઢે છે કે, જીવન એ ફક્ત દુઃખ ભોગવવા માટે જ છે. જ્યારે કંઈક સારું બને છે, ત્યારે આપણે આનંદ-ઉલ્લાસમાં અને સંતુષ્ટ હોઈએ છીએ. આનાથી વિપરિત, જ્યારે આપણી સાથે કંઈક અણબનાવ બને છે ત્યારે દુ:ખી, ડિપ્રેસ અને હતાશ થઈ જઈએ છીએ. આ જ ડીપ્રેશન છેવટે એટલી હદ સુધી આવે છે કે દુઃખમાંથી કાયમી મુક્ત થવા આપણે આત્મહત્યા કરવા તરફ પ્રેરાઈએ છીએ.
આપણી ઇચ્છા એવી હોય છે કે, ‘ખરાબ’ સમય ઝડપથી પસાર થઈ જાય પણ જ્યારે સમય સારો હોય છે ત્યારે આપણે એ સમયનું મહત્ત્વ નથી સમજતા. માટે, મુશ્કેલીના સમયમાં એ યાદ રાખવું ખૂબ જ મહત્ત્વનું છે કે, આ માત્ર એક સંજોગ છે અને કુદરતના નિયમ પ્રમાણે આ મુશ્કેલ સંજોગ પણ એનો સમય થતાં પસાર થઈ જશે અને પછી સારો સમય આવશે.
શું જીવનનો અંત લાવવાથી ઉકેલ આવે છે?
શું જીવનનો અંત લાવવાથી ખરાબ સમય જતો રહેશે? ચોક્કસપણે નહીં. કારણ કે, આવતા જન્મમાં આપણને આનાં ગંભીર પરિણામો ભોગવવા પડશે. તેથી, હિત એમાં જ છે કે, વર્તમાનમાં આવી પડેલી દુઃખદ પરિસ્થિતિનો સામનો કરો અને આ મુશ્કેલ સમયમાંથી પાર ઉતરો. જ્યારે આપણે, આ બધું જ સમતાથી પાર કરી દઈશું ત્યારે આ સંજોગો જ આપણને મજબૂત બનાવી દેશે.
મુશ્કેલ સમયમાં વાપરવા જેવી ઉપયોગી ચાવીઓ
- મૌન રહી ભોગવટામાં ન રહો – તરત જ મદદ માંગો!
- શારિરીક અને માનસિક સ્વાસ્થ્ય પ્રત્યે કાળજી રાખો.
- રોજનાં આહારમાં યોગ્ય ડાયેટ જાળવો. કારણ કે, આપણે જેવો આહાર લઈએ છીએ એવી જ અસર આપણા વિચારો પર પણ પડે છે.
- પોઝિટિવ રહેવાથી શક્તિ વધે છે.
- પોઝિટિવ વ્યક્તિઓનાં સંગમાં રહો.
- વર્તમાન પરિસ્થિતિને બદલવા માટે તમે શું કરી શકો એના પર ધ્યાન કેન્દ્રિત કરો.
- પરિસ્થિતિઓ ગમે તેટલી ખરાબ હોય, પરંતુ સુખી કે દુ:ખી રહેવું એ નિર્ણય આપણા હાથમાં છે.
- પોતાનામાં આત્મવિશ્વાસ રાખી, એમાંથી શક્તિ મેળવો.
- આપણને આનંદ થાય એવા કાર્ય કરીએ.
- રોજની દિનચર્યામાં ફેરફાર લાવીને વોક કરો અથવા પોતાના સગા-સંબંધી કે મિત્રોને જઈ મળો.
- યાદ રાખવું કે, કંઈપણ ક્યારેય કાયમના માટે રહેતું નથી.
- જેમની સ્થિતિ આપણા કરતાં પણ કપરી હોય એવા લોકોને જુઓ. આમ કરવાથી, દુઃખનો સામનો કરવાની શક્તિ મળશે.
- જરૂરિયાતમંદોને મદદ કરો. એનાથી તમને ઘણી શાંતિ મળશે.
પોઝિટિવિટી અને નેગેટિવિટીની અસરો
આ જગતમાં, ફક્ત ‘પોઝિટિવ’ તમને સુખ આપશે; ‘નેગેટિવ’ તમને દુ:ખ સિવાય કંઈ જ નહીં આપે. પોઝિટિવ રહીને દુઃખનો સામનો કર્યા સિવાય આપણે બીજું કંઈ કરી શકતા નથી. આ કપરો સમય પણ પછી જતો રહેશે. જીવનમાં આવતા દરેક સંજોગો પરિવર્તનશીલ હોય છે; કાયમનાં નથી હોતાં.
તેથી, આપણે ધીરજ રાખીને વર્તમાન સંજોગોનો સામનો કરવા માટે શક્તિ મળી રહે એવી પ્રાર્થના કરવી જોઈએ. પરંતુ ક્યારેય હાર માનવી નહીં. કારણ કે, આ મુશ્કેલીનો સમય પણ એક દિવસ જતો રહેશે.
subscribe your email for our latest news and events
દાદા ભગવાન ફાઉન્ડેશન, અડાલજ એ આધ્યાત્મિક નોન-પ્રોફિટ ઓર્ગેનાઈઝેશન છે જેનો હેતુ અક્રમ વિજ્ઞાનના આધ્યાત્મિક વિજ્ઞાન દ્વારા આખા જગતમાં સુખ-શાંતિ અને એકતા ફેલાવવાનો છે.
તમારા પ્રશ્નનો અચૂક જવાબ મેળવો
