એડજસ્ટમેન્ટ લેવાના જુદા જુદા રસ્તાઓ કયા છે?

પરમ પૂજ્ય દાદા ભગવાને પ્રરૂપિત સૂત્ર: “એડજસ્ટ એવરીવ્હેર”. તેમણે જીવનમાં કેવી રીતે એડજસ્ટમેન્ટ લઈ શકાય, તેના ઘણા જુદા જુદા રસ્તાઓ બતાવ્યા છે.

• સામી વ્યક્તિના વ્યૂ પોઈન્ટને એડજસ્ટ થવું તે મુખ્ય વસ્તુ છે. એના માટે ફરિયાદ કરતા પહેલા તમારે પોતાની જાતને તેની જગ્યાએ મૂકીને વિચારવું જોઈએ.
• ફરિયાદ કરવાના બદલે, તમારા અસંતોષને પોઝિટિવ વિચારોની શક્તિથી સંતોષમાં ફેરવી નાખો. આવું કરવા માટે અગવડતામાં પણ સગવડતા જુઓ. પરમ પૂજ્ય દાદાશ્રી કહે છે કે, "રાત્રે મને વિચાર આવ્યો કે, 'આ ચાદર મેલી છે' પણ પછી એડજસ્ટમેન્ટ મૂકી દીધું તે એટલી સુંવાળી લાગે કે ના પૂછો વાત."
• તમને દુઃખ કે ભોગવટો તમારા સારા અને ખરાબના અભિપ્રાયને કારણે થાય છે. તમારે તેના પર જાગૃતિ રાખવી જોઈએ. જ્યારે તમે કોઈ વસ્તુને સારી કહો છો, ત્યારે બીજી વસ્તુ તેની સરખામણીમાં ખરાબ બની જાય છે અને તમને ગૂંચવવાનું શરૂ કરી દે છે અને જો તમે સારા અને ખરાબ આ અભિપ્રાયોથી બહાર નીકળી જાવ તો, તમને કોઈ ભોગવટો નહીં આવે. ‘એડજસ્ટ એવરીવ્હેર'.
• યાદ રાખો કે, બધી પરિસ્થિતિઓ આવીને અંતે જતી રહેવાની છે. ખરેખર તો પરિસ્થિતિઓ જતી રહેશે અને અથડામણથી થયેલ નુકસાનથી લાંબા સમય સુધી તેના પડઘા પડ્યા રાખશે. પરમ પૂજ્ય દાદાશ્રી કહે છે કે, "તમારે શા માટે એડજસ્ટ થવું જોઈએ, કારણ કે, જગતની દરેક ઘટના અંતવાળી છે; તેનો અંત આવવાનો જ છે, પણ જો તે લાંબી ચાલે અને તમે તેને એડજસ્ટ ના થાવ, તો પછી તમે પોતે અને સામી વ્યક્તિ બંને દુઃખી થાવ છો.”
• ‘સત્ય’ને તપાસવામાં બહુ ગૂંચવાઈ ના જશો. ખરેખર તો ‘સત્ય’ એ રીલેટિવ છે અને દરેક વ્યક્તિના વ્યૂ પોઈન્ટના આધારે છે. લોકો જે કહે તે સાચું હોય કે નહીં, તમારે એડજસ્ટ થઈ જવું જોઈએ. જો કોઈ તમને કહે કે, “તમે અક્કલ વગરના છો”, તો તમારે એવું કહી ને તુરંત જ એડજસ્ટ થઈ જવું કે, "તમે સાચા છો. હું પહેલેથી જ થોડો ધીમો (ઢીલો) છું. તમને તો આજે ખબર પડી, હું તો નાનપણથી જ જાણું છું." તમે આવી રીતે જવાબ આપશો, તો તમે અથડામણ ટાળી શકશો. તેઓ તમને પછી ફરી ક્યારેય હેરાન નહીં કરે.
• કાઉન્ટર પુલી વાપરો. પરમ પૂજ્ય દાદાશ્રી આપણને પુલી સિસ્ટમનું ઉદાહરણ આપીને સમજાવીને એડજસ્ટ થવાનું કહે છે. જો તમારા રિવોલ્યૂશન ૧૮૦૦ rpmના હોય ને સામાના ૬૦૦ હોય અને તમે તમારા અભિપ્રાય એના પર બેસાડવાનો પ્રયાસ કરશો, તો સામાનું એન્જિન તૂટી જશે અને બધા ગિયર બદલવા પડશે. એ લોકો તમારી વાત ત્યારે જ સમજશે, જ્યારે તમે કાઉન્ટર પુલી નાખીને તમારા રિવોલ્યૂશન ધીમા કરશો.
• ધારો કે, તમે કોઈ પરિસ્થિતિમાં એડજસ્ટ ના થઈ શક્યા અને કોઈને દુઃખ થઈ ગયું, તો તમે પાછા તેમની પાસે જાવ અને માફી માંગો. અથડામણ વધુ આગળ ના વધારતા પરિસ્થિતિને એડજસ્ટ થવાનો આ પણ એક ઉપાય છે.
• તમે વિચાર કરો કે, જો કોઈ તમને તમારી ભૂલો બતાવે ત્યારે તમે સહન કરી શકતા નથી, તો તમે બીજા લોકોને તેમની ભૂલો કેવી રીતે બતાવી શકો છો. તેના બદલે તમે સામી વ્યક્તિની પ્રકૃતિને ઓળખો, જેનાથી તમને તે સમજાશે કે તે આવું શાથી કરી રહ્યો છે, પછી તમે તેને એડજસ્ટ થઈ શકશો.
• દરેકને તે જેવા છે તેવા તેમને સ્વીકારો, એમને બદલવા પ્રયત્ન ના કરો. આવું ઘરની વ્યક્તિઓ સાથે સૌથી મહત્ત્વનું બની જાય છે. પરમ પૂજ્ય દાદાશ્રી કહે છે કે, “કોઈ કહેશે કે, 'ભઈ, એને સીધો કરો.' અરે, એને સીધો કરવા જઈશ તો તું વાંકો થઈ જઈશ.”
• તમારા કુટુંબીજનો અને પતિ/પત્ની, જેવા છે તેવા તેમને સ્વીકારો, તે જ સૌથી સારું છે. એવું વિચારો કે તમારું ઘર જુદા જુદા ફૂલોવાળો (વ્યક્તિત્વ ધરાવતો) એક બગીચો છે. પરમ પૂજ્ય દાદાશ્રી કહે છે કે, "શું તમે બગીચાના બધા ફૂલોને નહીં વખાણો? એક ઘરમાં એક ગુલાબ જેવું, એક મોગરા જેવો, એટલે પેલો ગુલાબ બૂમો પાડે કે તું કેમ મારા જેવું નથી? તારો રંગ જો કેવો સફેદ, મારો રંગ કેવો સરસ છે? ત્યારે મોગરો કહેશે કે, તારે તો નર્યા કાંટા છે. હવે ગુલાબ હોય તો કાંટા હશે, મોગરો હશે તો કાંટા નહીં હોય. મોગરાનું ફૂલ સફેદ હશે.” તો વિચારો, અભિપ્રાયો અને વ્યક્તિત્વની વિવિધતાને વખાણ કરીને મતભેદ ઓછા કરો. (અથડામણ ટાળો)
• એડજસ્ટમેન્ટ લેવાનો મતલબ એવો નથી કે તમે સામી વ્યક્તિ સાથે માત્ર અથડામણ ટાળવા, તે જેમ કહે તેમ આંખ મીંચીને કરો. તમારે સામે બેસીને પ્રોબ્લેમ શું છે તે વિશે વાતચીત કરવી જોઈએ. દરેક વ્યક્તિ પોતાનો મત દર્શાવી શકે છે અને આ રીતે વધારે મતભેદ પાડ્યા વિના, પરસ્પર સમજૂતીથી સમસ્યાનો નિકાલ લાવી શકાય.
• એવા લોકોનું નિરીક્ષણ કરો જે કેવી રીતે એડજસ્ટ કરવું તે જાણે છે અને તેમની પાસેથી શીખો.

એવી રીતે એડજસ્ટ કરો કે જેથી તમારા લીધે કોઈને મુશ્કેલીમાં ન પડે.