ભગવાનની ઓળખ

આપણે બાળપણથી જ ભગવાન અને દેવ-દેવીઓને પ્રાર્થના કરતા હોઈએ છીએ, ભક્તિ કરીએ છીએ અને ઘણી જુદી જુદી રીતે ભગવાન અને ધર્મની સાથે સંકળાયેલા છીએ, છતાં આપણે પૂછીએ છીએ કે: ભગવાન કોણ છે? શું ભગવાન ખરેખર અસ્તિત્વ ધરાવે છે? શું ખરેખર ભગવાન છે? ભગવાન ક્યાં છે? શું કોઈએ ભગવાનને જોયા કે અનુભવ્યા છે? ભગવાનનું સરનામું શું છે? આ બ્રહ્માંડ કોણે બનાવ્યું? શું ભગવાનના અસ્તિત્વનો કોઈ પૂરાવો છે? શું ભગવાન આ જગતને ચલાવે છે? ભગવાનનો ન્યાય શું છે? આપણે ભગવાન સાથે અભેદ કેવી રીતે થઇ શકીએ? શું હું ભગવાનનો પ્રેમ પ્રાપ્ત કરી શકુ? શું આપણી ભગવાનને કરેલ પ્રાર્થનાઓનો જવાબ મળે છે? એક જ ભગવાન છે કે અનેક ભગવાન છે? શું ભગવાનનો પ્રેમ અનુભવી શકાય? શું ભગવાન અને વિજ્ઞાન વચ્ચે કોઈ સંબંધ છે? એમાં શંકાને કોઈ સ્થાન નથી કે, આપણા બુદ્ધિશાળી દિમાગમાં આવા ઘણા પ્રશ્નો ઉદ્‍ભવે છે. આખરે ભગવાનને જાણવાની તમારી જિજ્ઞાસા તમને અહીં લઈ આવી!

જ્યારે આપણે વિશાળ બ્રહ્માંડને જોઈએ છીએ, ત્યારે આપણે એક અદ્‍ભૂત શક્તિનો અનુભવ કરીએ છીએ, જે બધાને સૂમેળ ભર્યુ રાખતી હશે એવું લાગે છે. બીજુ, જ્યારે આપણે સુંદર કુદરતને જોઈએ છીએ, ત્યારે આપણે તેના વખાણ કરીએ છીએ અને એક આત્મીયતાની લાગણીનો અનુભવ થાય છે. છતાં, આપણે કોઈવાર કુદરતી આફતો, બિમારીઓ, ગરીબી, દુઃખો, અન્યાય અને હિંસા જોઈને વિચલીત થઈ જઈએ છીએ. એક તરફ આપણે જોઈએ છીએ કે મનુષ્ય જાતિએ વિજ્ઞાન અને ટેકનોલોજીમાં અભૂતપૂર્વ પ્રગતિ કરી છે; જ્યારે બીજી તરફ આપણે જોઈએ છીએ કે, કેવી રીતે વધારે અને વધારે લોકો તણાવ, ડિપ્રેશન અને ચિંતાઓથી પીડાય છે. આવુ દ્વંદ્વ જગત ઉપર દર્શાવ્યા પ્રમાણે ઘણા બધા પ્રશ્નો ઉભા કરે છે, જેમકે: ભગવાન ક્યાં છે? પ્રાર્થનામાં શકિત ક્યાં છે? ભગવાનનો પ્રેમ ક્યાં અલોપ થઈ ગયો? આ બધો અન્યાય શા માટે? શા માટે સત્કર્મો કરનાર લોકોને સહન કરવું પડે છે, જ્યારે દુષ્કર્મો કરનાર લોકો આરામથી ફરે છે?  

તો, શું ભગવાન છે? હા, ખરેખર ભગવાનનું અસ્તિત્વ છે! તદુપરાંત, તે ભગવાન તમારી અંદર જ છે. પરમ પૂજ્ય દાદાશ્રી કહે છે, “ગોડ ઈઝ ઇન એવરી ક્રીએચર, વેધર વિઝીબલ ઓર ઈનવિઝીબલ.”

ઘણાં લોકો પરમ પૂજ્ય દાદાશ્રી પાસે આવા પ્રશ્નો લઈને આવતા અને માત્ર સંતોષકારક જવાબો જ નહી પરંતુ મહીંલા ભગવાનનો અનુભવ પણ પ્રાપ્ત કરતા. અમે ઇચ્છીએ છીએ કે તમે પણ આવોજ અનુભવ પ્રાપ્ત કરશો જ્યારે તમે ભગવાનને શોધવા અને અનુભવવા માટે આગળ (નીચે) વાંચશો!

 

ભગવાન મૂળ પુરૂષોની દ્રષ્ટિએ

બધા ભગવાને એમ જ કહ્યું કે, 'આત્માને ઓળખો, તમામ દુ:ખોથી છુટો અને મોક્ષે ચાલ્યા જાવ'. જ્ઞાનીઓ પણ આજે એજ રસ્તો બતાવી રહ્યા છે કે તમારી મહીં ભગવાન ખરા સ્વરૂપે છે.

Top Questions & Answers

  1. ભગવાન ક્યાં છે?
  2. શું ભગવાને આ જગતની રચના કરી છે?
  3. શું બ્રહ્મા, વિષ્ણુ, મહેશે ભેગા મળીને આ જગતની રચના કરી છે?
  4. શું ભગવાનના કોઈ ગુણો છે?
  5. ભગવાનનો પ્રેમ કેવી રીતે સંપાદિત કરવો?
  6. શું ભગવાનની ભકિત કે ભગવાનમાં શ્રધ્ધા આપણને મુકિત આપી શકે?
  7. શું ભગવાન બધા પાપોની ક્ષમા આપી શકે? સાચુ સુખ શું છે?
  8. ભગવાનમાં એકાગ્રતા કેવી રીતે વધારવી?
  9. ભગવાન પદની પ્રાપ્તિ કેવી રીતે કરવી?
  10. શું મૂર્તિપૂજા કે દર્શન જરૂરી છે?
  11. અંબામાતા અને દુર્ગા દેવી કોણ છે?
  12. સરસ્વતી માતા શું સૂચવે છે?
  13. લક્ષ્મીજી ક્યાં રહે છે? એમના કાયદા શું છે?
  14. શું ભગવાન બ્રહ્માંડના સ્વામી છે? જીવનમાં બંધંનોથી કેવી રીતે મુક્ત થઈ શકાય? મોક્ષ કેવી રીતે પ્રાપ્ત થાય?

Spiritual Quotes

  1. ગોડ ઈઝ ઈન એવરી ક્રીએચર વ્હેધર વિઝિબલ ઓર ઈન્વિઝિબલ. (ભગવાન દરેક જીવ માત્રમાં છે, પછી તે આંખે દેખાય એવા કે ન દેખાય એવા હોય) તમારી ને મારી વચ્ચે દૂરબીનથીય ન જોઈ શકાય એવા અનંત જીવો છે. 
  2. જો ભગવાન ઉપરી હોય અને તે જો મોક્ષે લઈ જનાર હોય, તો તો એ જ્યારે કહે કે અહીંથી ઊઠ, તો તમારે તરત જ ઊઠવું પડે. તેને મોક્ષ શી રીતે કહેવાય? મોક્ષ એટલે સંપૂર્ણ સ્વતંત્ર. કોઈ ઉપરી નહીં અને કોઈ અંડરહેન્ડ પણ નહીં. 
  3. આ દેહ તો (પેકીંગ) ખોખું છે. મહીં બેઠા છે તે ભગવાન છે. 
  4. પુરુષ તો કોનું નામ કહેવાય? ક્રોધ-માન-માયા-લોભ એ નિર્બળતા જેને ના હોય, એને ભગવાને 'પુરુષ' કહ્યા. 
  5. જેનામાં 'હુંકાર' ગયો હોય ને, ત્યાં પછી એ જ ભગવાન! જો કદી વધારે દર્શન કરવા જેવું પદ હોય તો આ એકલું જ કે જેનો 'હુંકાર' ગયો હોય, પોતાપણું ગયું હોય. જ્યાં પોતાપણું ગયું ત્યાં બધું સર્વસ્વ ગયું. 
  6. આ જગત સાયન્ટિફિક સરકમસ્ટેન્શિયલ એવિડન્સ માત્રથી ચાલે છે. ચલાવનારો કોઈ બાપોય ઉપર નવરો નથી. 'વ્યવસ્થિત' શક્તિ કહીએ છીએ. તે બધાને વ્યવસ્થિત જ રાખે છે. 
  7. કર્તા થાય તો ભોક્તા થવું પડે ને? ભગવાન તો જ્ઞાતા-દ્રષ્ટા ને પરમાનંદી છે. પોતાના અપાર સુખમાં જ રાચ્યા રહે છે. 
  8. તું જ તારો ઉપરી, તારો રક્ષક પણ તું જ ને તારો ભક્ષક પણ તું જ. યુ આર હોલ એન્ડ સોલ રીસ્પોન્સિબલ ફોર યોરસેલ્ફ. પોતે જ પોતાનો ઉપરી છે. આમાં બીજો કોઇ બાપો ય આંગળી ઘાલતો નથી. આપણો બોસ છે તે ય આપણી ભૂલથી ને અન્ડરહેન્ડ છે તે ય આપણી ભૂલથી જ છે. માટે ભૂલ ભાંગવી પડશે ને?
  9. 'તારો ઉપરી વર્લ્ડમાં કોઈ નથી. તારાં ઉપરી તારાં બ્લંડર્સ અને તારી મિસ્ટેકો છે. એ બે નહીં હોય તો તું પરમાત્મા જ છે.' 
  10. ભગવાન તો તમારું સ્વરૂપ છે. તમારો કોઈ ઉપરી જ નથી, કોઈ બાપોય ઉપરી નથી.
  11. જીવમાત્રની અંદર ભગવાન બેઠેલા છે, ચેતનરૂપે છે. 
  12. ભગવાનને ત્યાં તો એટલું જ છે કે ‘કોઈ જીવને દુઃખ ન થાય, એ જ અમારી આજ્ઞા છે.  
  13. મા-બાપની સેવા, એ પ્રત્યક્ષ રોકડું છે. ભગવાન દેખાતો નથી, આ તો દેખાય છે. ભગવાન ક્યાં દેખાય છે? અને આ મા-બાપ તો દેખાય છે. 
  14. આ નાસ્તિક હોય છે એ ભગવાનમાં માનતો ના હોય, ધર્મમાં માનતો ના હોય, પણ છેવટે નીતિમાં માનતો હોય છે ને નીતિ એ તો મોટામાં મોટો ધર્મ છે. નૈતિકતા વગર ધર્મ જ નથી. 
  15. વધઘટ થાય તેને આસક્તિ કહેવાય. જે વધ-ઘટ ના થાય તે પરમાત્મ પ્રેમ છે. એટલે ગમે તે માણસ વશ થઈ જાય. 
  16. જે વધ-ઘટ ના થાય તે પરમાત્મ પ્રેમ છે. 
  17. ભોગવે એની ભૂલ. એ ભગવાનની ભાષા! અને અહીં ચોરી કરી ગયો, એને લોક ગુનેગાર ગણે. કોર્ટો હઉ, ચોરી કરે તેને જ ગુનેગાર ગણે.

Related Books

×
Share on
Copy