આધ્યાત્મિક સૂત્રો

સદ્બુદ્ધિ' એનું નામ કે ક્યારે ય પણ વિરોધાભાસ ના લાવે. 'જ્ઞાની પુરુષ' પાસે એક કલાક બેસવાથી સદ્બુદ્ધિ ઉત્પન્ન થાય.

જેમ જેમ અજ્ઞાનતા વધે, તેમ તેમ વિકલ્પો વધે ને તેમ તેમ મોહનાં સાધનો વધારે પ્રાપ્ત થાય. કાદવમાં ગરકયા પછી શું થાય ?

બહુ દુઃખ વેઠ્યાં છે. જો તેની નોંધ કરે ને તો ય મોહ છૂટી જાય ! છતાં મોહ ઊતરતો નથી ને માર ખવડાય ખવડાય કરે છે !

જ્ઞાની' અને 'અજ્ઞાની'માં ફેર શો ? 'જ્ઞાની' બધી જ ક્રિયાઓમાં રાગ-દ્વેષરહિત હોય ને અજ્ઞાની બધી જ ક્રિયાઓમાં રાગ-દ્વેષસહિત હોય.

ઉપાધિમાં શાંતિ રહે, એને ભગવાને પુરુષાર્થ કહ્યો અને ઉપાધિમાં સમાધિ રહે, એને ભગવાને 'જ્ઞાન' કહ્યું.

જો શંકા કરવી તો આખી જિંદગી કરવી. ખોટની ચિંતા કરવી તો આખી જિંદગી કરવી, નહીં તો કરવી નહીં.

સંગનો વાંધો નહીં, પણ સંગદોષ ના લાગવો જોઈએ. એ ચેપી છે !

સત્સંગમાં ગમે તેટલાં કષ્ટ પડે તે સારાં, પણ કુસંગમાં ગમે તેટલું સુખ નકામું.

વીતરાગો કહે છે કે હિંસાની સામે અહિંસાનું હથિયાર વાપરો. હિંસાને હિંસાથી ના જિતાય. એ તો અહિંસાથી જ જિતાય.

ઇગોઇઝમ'ને લીધે આ સંસાર ઊભો છે. બંધન 'ઇગોઈઝમ'ને લીધે છે. 'ઇગોઈઝમ' કોઈ પણ રસ્તે બંધ થાય તો છૂટાય.

મોક્ષે જવા નિજસ્વરૂપનું ભાન અને નિજસ્વરૂપનું લક્ષ જોઈશે.

સત્' અને સત્યમાં શો ફેર છે ? સત્ય 'રીલેટિવ' છે, વિનાશી છે અને સત્ એ અવિનાશી છે.