આધ્યાત્મિક સૂત્રો

પુરુષાર્થ એનું નામ કે જે ફળે જ!

નિશ્ચય એ જ પુરુષાર્થ છે!

જેટલાં નિશ્ચય કર્યા છે, તેટલાં જ ફળશે. બીજું કશું જ નહીં કરવાનું.

આ દુનિયામાં કોઈ ચીજ બંધન કરતી નથી. એકલું પરસ્ત્રીની લૂંટ ચાલે તે જ બંધન કરે છે.

મનુષ્યપણું ક્યાં સુધી રહે? અણહક્કનું કિંચિત્‌માત્ર ન ભોગવે ત્યાં સુધી મનુષ્યપણું છે.

સ્ત્રીનું ભેગું થવું એ જોખમ નથી, પણ આંખનું ખેંચાણ થવું એ જોખમ છે. માટે ત્યાં પ્રતિક્રમણ કરીને કેસ ઊંચો મૂકી દો.

અજ્ઞાનેય એક પ્રકારનું અજવાળું છે. પણ તે ભૌતિક સુખને દેખાડનારું છે ને ‘જ્ઞાન’ સાચા સુખને દેખાડનારું છે.

‘જ્ઞાન’ એટલે ‘પોતે’ પોતાના ‘મૂળ સ્વરૂપ’ને જાણવું, ને તેને ના જાણવું તે અજ્ઞાન.

બંધનનું ઉપાદાન કારણ શું? અજ્ઞાન. મોક્ષનું ઉપાદાન કારણ શું? ‘જ્ઞાન’.