આધ્યાત્મિક સૂત્રો

જેટલી ભ્રમણા તેટલી નિર્બળતા. જે ભ્રમણારહિત છે તેને નિર્બળતા કેવી?

હિંસા કોની કરશો? જીવમાત્રમાં પરમાત્મા જ છે! કોને દુઃખ દેશો?

વીતરાગો શું કહે છે? હિંસા સામે અહિંસા રાખો, તો સુખ આવશે. હિંસાથી હિંસા કોઈ દહાડો બંધ થવાની નથી. અહિંસાથી હિંસા બંધ થશે.

અહિંસા તો કોનું નામ કહેવાય, કે પૂરી શક્તિ હોય, છતાં એને કોઈ કશું કરે, તોય એ સામું કશું જ ના કરે!

મોટામાં મોટી હિંસા હોય આ જગતમાં તો કષાયથી!

જ્યાં આત્મા ત્યાં ક્રોધ-માન-માયા-લોભ નહીં ને જ્યાં ક્રોધ-માન-માયા-લોભ ત્યાં આત્મા નહીં!

‘ઈગોઈઝમ’ને લીધે આ સંસાર ઊભો છે. બંધન ‘ઈગોઈઝમ’ને લીધે છે. ‘ઈગોઈઝમ’ કોઈ પણ રસ્તે બંધ થાય તો છૂટાય.

જ્યારથી ‘હું બંધનમાં છું’ એવું ભાન થાય છે, ત્યારથી છૂટવાની ઈચ્છા તેને થાય છે.

બંધન એ ‘અજ્ઞાનતા’નું ફળ છે ને મોક્ષ એ ‘જ્ઞાન’નું ફળ છે.

સાહજિક વાણી એટલે જેમાં કિંચિત્‌માત્ર અહંકાર ના હોય!

સ્યાદ્‍વાદ શું કહે છે? કે પોતાનું જે કંઈ પદ હોય તે ભૂલીને સામાની વાત સાંભળજે.