આધ્યાત્મિક સૂત્રો

જેટલી ભ્રમણા તેટલી નિર્બળતા. જે ભ્રમણારહિત છે તેને નિર્બળતા કેવી?

અહિંસા જેવું કોઈ બળ નથી અને હિંસા જેવી કોઈ નિર્બળતા નથી. આ દુનિયામાં નિર્બળ કોણ? અહંકારી. આ દુનિયામાં સબળ કોણ? નિર્‌અહંકારી.

હિંસા કોની કરશો? જીવમાત્રમાં પરમાત્મા જ છે! કોને દુઃખ દેશો?

અહિંસાના સામ્રાજ્ય વગર કોઈ દહાડોય ‘કેવળજ્ઞાન’ થાય નહીં. અહિંસા વગર સંપૂર્ણ જાગૃતિ આવશે નહીં.

વીતરાગો શું કહે છે? હિંસા સામે અહિંસા રાખો, તો સુખ આવશે. હિંસાથી હિંસા કોઈ દહાડો બંધ થવાની નથી. અહિંસાથી હિંસા બંધ થશે.

અહિંસા તો કોનું નામ કહેવાય, કે પૂરી શક્તિ હોય, છતાં એને કોઈ કશું કરે, તોય એ સામું કશું જ ના કરે!

મોટામાં મોટી હિંસા હોય આ જગતમાં તો કષાયથી!

જ્યાં આત્મા ત્યાં ક્રોધ-માન-માયા-લોભ નહીં ને જ્યાં ક્રોધ-માન-માયા-લોભ ત્યાં આત્મા નહીં!

‘ઈગોઈઝમ’ને લીધે આ સંસાર ઊભો છે. બંધન ‘ઈગોઈઝમ’ને લીધે છે. ‘ઈગોઈઝમ’ કોઈ પણ રસ્તે બંધ થાય તો છૂટાય.

જ્યારથી ‘હું બંધનમાં છું’ એવું ભાન થાય છે, ત્યારથી છૂટવાની ઈચ્છા તેને થાય છે.

‘આ સારું’, ‘આ ખોટું’ એ બેઉ સંસાર છે, બેઉ બંધન છે. ને મુક્તિ કોનું નામ કે બેઉ બંધન છે, તે જાણે.