આધ્યાત્મિક સૂત્રો

મોક્ષની ઈચ્છા કરવાથી બીજી બધી ઈચ્છાઓ છૂટી જાય છે!

યાદ આવે તેનું પ્રતિક્રમણ કરવું. ઈચ્છા થાય તેનું પ્રત્યાખ્યાન કરવું.

જેનો સંગ સુધર્યો, તેનું બધું જ સુધર્યું. જેનો સંગ બગડ્યો, તેનું બધું જ બગડ્યું.

પ્રેમસ્વરૂપ થશો ત્યારે લોકો તમારું સાંભળશે, ‘પ્રેમસ્વરૂપ’ ક્યારે થવાય? કાયદા-બાયદા ના ખોળો ત્યારે. જગતમાં કોઈનાય દોષ ન જુઓ ત્યારે.

‘સિન્સિયર’ રહેવાથી સંસારમાં કોઈ પણ પ્રકારનો ભય ના આવે ને મોક્ષે લઈ જાય!

‘ઈમોશનલ’ થાવ તોય જગત અટકવાનું નથી ને ‘ઈમોશનલ’ ના થાવ તોય જગત અટકવાનું નથી. આ તો ‘ઈમોશનલ’પણાનો જ માથે ભાર આવે છે. બાકી, જગત તો ચાલ્યા જ કરે છે, એ કોઈ દહાડો અટકવાનું નથી.

પુણ્યના આધારે તમારો પુરુષાર્થ નફો લાવે ને પુણ્ય પરવારે તો એ પુરુષાર્થ ખોટ લાવે.

કેવું સ્ટેજ પ્રાપ્ત હોવું જોઈએ? આપણાં ઘરમાં ક્લેશ ક્યારેય પણ ના થાય, એવી આપણી બુદ્ધિ ઉત્પન્ન થવી જોઈએ. બીજું બધું ચાલે પણ અંતરક્લેશ ના થવો જોઈએ.

'ઠીક છે' એવું ના બોલીએ. 'સારું છે' એમ બોલીએ એટલે સારું જ થાય.

હિંસકભાવ ના રહે તે સંયમી કહેવાય. ક્રોધ-માન-માયા-લોભમાં પણ હિંસક ભાવ ના રહે, એનું નામ સંયમ. સંયમી મોક્ષે જાય.

પરિસ્થિતિ બદલાશે, પણ જ્ઞાન નહીં બદલાય.

'જ્ઞાની'ની આજ્ઞા મનનું શુદ્ધિકરણ કરે છે. 'સ્વરૂપ'નું જ્ઞાન મનને ગમે તે સંજોગોમાં સમાધાન આપશે.