આધ્યાત્મિક સૂત્રો

આ ‘દાદો’ તો એવો પાક્યો છે કે જે કશાથી ખરીદાય તેવો છે જ નહીં. એક માત્ર પરમ વિનયથી જ ખરીદાય તેવો છે! વિનય અને પ્રેમ કોઈથી તરછોડાય તેમ નથી.

મોક્ષનો માર્ગ શો છે? વિવેકમાંથી સદ્‌વિવેક, સદ્‌વિવેકમાંથી વિનય, વિનયમાંથી પરમ વિનય અને પરમ વિનયથી મોક્ષ!

પરમ વિનય એટલે સંપૂર્ણ સમર્પણ.

વિવેક એટલે ખરા-ખોટાને જુદું પાડવું તે. સદ્‌વિવેક એટલે સારાને ગ્રહણ કરાવે તે. વિનય એટલે વ્યવહાર પ્રમાણે ચાલે છે તેનાથી આગળ ગયા તે. પરમ વિનય એટલે જે દેખાય છે તે તરફનો આદરભાવ નહીં, પણ જે નથી દેખાતું તે તરફનો આદરભાવ!

પરમ વિનય એટલે શું? આપણા નિમિત્તે કોઈને કિંચિત્‌માત્ર દુઃખ ના થાય એ જ આપણો પરમ વિનય છે!

‘પરમ વિનય’થી મોક્ષ છે અને સંસારમાંય પરમ વિનયથી તું બહુ સુખી થઈશ.

બહારના વિનયથી અવતાર મળે, અંદરના વિનયથી મોક્ષ મળે.

નય હોય તેનાથી દૃષ્ટિબિંદુ સમજાય, પણ વિનય હોય તેનાથી મોક્ષે જવાય.

આત્મા પ્રાપ્ત કર્યા પછી જ પરમ વિનય ઉત્પન્ન થાય, પછી જુદાઈ લાગે નહીં. અભેદ દૃષ્ટિ થાય.

લઘુતમ ભાવમાં રહેવું અને અભેદ દૃષ્ટિ રાખવી, એ આ ‘અક્રમ વિજ્ઞાન’નું ‘ફાઉન્ડેશન’ છે!

લઘુતમમાં રહે, તેને ગુરુતમ પદ ‘ફ્રી ઓફ કોસ્ટ’ (મફત) મળવાનું જ!

દૃષ્ટિ લઘુતમમાં રાખો તો જ પેલા ગુરુતમમાં પહોંચાશે. નહીં તો ગુરુતમમાં કેમ પહોંચાશે?