"અનંત" પર આધ્યાત્મિક સૂત્રો

જેનામાં રાગ નામનો રોગ નથી એવા વીતરાગની કૃપાથી અનંતકાળનો રોગ જાય.

અનંત અવતારથી ‘અમે’ પૂર્ણ પુરુષોત્તમ ખોળતા હતા, તે આ અવતારમાં ‘અમારા’ જ દેહમાં પ્રગટ થયા!!!

અનંત ભૂલનું ભાજન છે આ મનુષ્યમાત્ર, છતાં એને એની ભૂલ દેખાતી નથી. ભૂલ ભાંગશે ત્યારે મોક્ષે જવાશે. ભૂલ ભાંગશે શેનાથી?! જીવમાત્રને મહીં સૂઝ નામની શક્તિ છે. આ એકલી જ શક્તિ મોક્ષે લઈ જાય છે.

‘મોક્ષે જતાં વિઘ્નો અનેક પ્રકારના હોવાથી તેની સામે ‘શુદ્ધ ચેતન’ અનંત શક્તિવાળો છે!’ આ તો માયાનાં વિઘ્નો છે!

આપણે બળવાન થવાનું નથી, નિર્બળતા કાઢવાની છે. તમે પોતે જ અનંત શક્તિના ધણી છો! સુખેય બહાર ખોળવાનું નથી, મહીં અપાર છે!

આત્માની તો અનંતશક્તિ છે. જેટલી બાજુએ શક્તિ ફેરવવી હોય તેટલી બાજુએ ફરે તેમ છે! એને ફેરવનાર જોઈએ. કરોડો બાજુએ ફેરવી શકાય! જો પોતે ગૂંચાય કે ‘આટલી બધી ભાંજગડ આવી, હવે શું થશે, શું થશે’ કહે તો શું થઈ જાય? કંઈનું કંઈ થઈ જાય! કૈકેયીએ કર્યું હતું ને?!

આત્માની અનંત શક્તિ છે! તમે આત્મા જાણ્યા પછી આત્મામાં એકતાર થાવ તો તે પ્રગટ થાય.