દુર્ગા દેવી અને અંબે માતા કોણ છે?
દેવી અંબીકા, જે દુર્ગા માં કે અંબા માતા તરીકે પણ ઓળખાય છે, તેઓને હિન્દુસ્તાનના ઘણા ધર્મોએ તેમને સ્વીકાર્યા છે અને તેમની ભક્તિ-આરાધના કરે છે. પશ્ચિમ બંગાળમાં, અંબા માતા દુર્ગા મા તરીકે ઓળખાય છે. તે અંબા મા, બહુચર મા, કાલિકા મા, ભદ્રકાળી મા, મા ભવાની વગેરે ઘણા નામે ઓળખાય છે.
દેવી અંબિકા સહજ પ્રાકૃતિક શક્તિ સૂચવે છે!
દેવી અંબિકા એ આધ્ય શક્તિ છે એટલે કે ઊર્જાનો મૂળ સ્ત્રોત. તેમની પાસે સંસારના વિઘ્નોને દૂર કરવા માટે દૈવી શક્તિ છે અને તે તમારી પ્રકૃતિને ખૂબ શક્તિઓ આપે છે, જેથી તમે સહજ બની શકો.
દેવી અંબિકા તમારી પ્રકૃતિને સહજ બનાવે છે. જ્યારે તમે સહજ સ્થિતિમાં રહીને વર્તન કરો છો, ત્યારે તે તમારી સહજ પ્રકૃતિ સૂચવે છે.
આપણે અંબે માને કઈ રીતે પ્રસન્ન કરી શકીએ?
અંબે મા ત્યારે જ પ્રસન્ન થાય છે જ્યારે આપણે તેમના કાયદાઓ પાળવાના યથાર્થ પ્રયત્નો કરીએ!
શું તમે જાણો છો કે જ્ઞાની પુરૂષ હંમેશા દેવ દેવીઓના કાયદામાં જ રહેતા હોય છે?
જ્ઞાની ક્યારેય તેઓના કોઇ કાયદાને તોડતા નથી, અને તે હંમેશા તેઓને આદર આપે છે, કોઇ પણ મહત્વનું કાર્ય કરતા પહેલા તેમનો અભિપ્રાય લે છે. એટલા માટે ત્રણેય દેવીઓ – દેવી અંબિકા, દેવી સરસ્વતી અને દેવી લક્ષ્મીજી હંમેશા જ્ઞાની પ્રસન્ન રહે છે, હંમેશા તેમની આસ પાસ રહીને તેમનું રક્ષણ કરે છે. બધા દેવ દેવીઓની જ્ઞાની ઉપર હંમેશા કૃપા રહે છે, અને તેઓ હંમેશા તેની સાથે રહે છે, જગતના કલ્યાણના કાર્યમાં અત્યંત સહાય કરે છે!
જો તમે તેઓના કાયદાઓ પાળવાનું નક્કી કરો, તો માતાજી તમારા ઉપર પણ પ્રસન્ન રહેશે.
દાદાશ્રી: દરેક દેવીઓના કાયદા હોય છે તે કાયદા પાળે તો માતાજી ખુશ રહે. અમે અંબેના એકના એક લાલ છીએ. માતાજી પાસે તમે અમારી ચિઠ્ઠી લઈને જાવ તો તે સ્વીકારે. આ તમારો દીકરો હોય અને નોકર હોય. પણ જો નોકર તમારા કાયદામાં જ રહેતો હોય તો તમને નોકર વહાલો લાગે કે નહીં ? લાગે જ. અમે ક્યારેય પણ અંબામાના, લક્ષ્મીજીના કે સરસ્વતી દેવીના કાયદા તોડ્યા નથી. નિરંતર તેમના કાયદામાં જ રહીએ છીએ. તેથી એ ત્રણેય દેવીઓ અમારા ઉપર નિરંતર પ્રસન્ન રહે છે. તમારે પણ જો તેમને પ્રસન્ન રાખવા હોય તો તેમના કાયદા પાળવા જોઈએ.
પ્રશ્નકર્તા: અંબામાતાના શા કાયદા છે? અમારે ઘેર અંબામાતાની ભક્તિ કરે છે બધાં. પણ એના કાયદા શા છે તે અમે જાણતા નથી.
દાદાશ્રી: અંબાજી દેવી એટલે શું? એ પ્રકૃતિની સહજતા સૂચવે છે. જો સહજતા તૂટી તો અંબાજી તારી ઉપર રાજી જ કેમ થાય? આ અંબાજી દેવી તો કહેવું પડે! તે તો માતાજી છે, મા છે.
પ્રશ્નકર્તા: સ્થાપના કરેલી દેવીઓ ખરી, તે શાનાં આધારે ફળ આપતી હશે ?
દાદાશ્રી: દેવી તો કેન્દ્ર છે. તમારી જેટલી શ્રધ્ધા એટલું ફળ મળે. તમારી જેટલી શ્રધ્ધા એટલું ફળ મળે.
પ્રશ્નકર્તા: આપણા ઉદયકર્મમાં દુઃખ હોય અને આપણે અંબાજીને ભજતાં હોઈએ અંબાજીની ઉપાસના કરતાં હોઈએ તો શું એ દુઃખ દૂર કરી શકે ખરાં ?
દાદાશ્રી: ના. એનાથી, એમની કૃપાથી શાંતિ રહે, બધા માર્ગ સરળ થાય. કૃપાથી પ્રકૃતિનો માર્ગ સરળ થાય. આ દેહ છે, પ્રકૃતિ છે, શક્તિ રૂપ છે. અને માતાજી શક્તિ રૂપ છે, શક્તિનો અવતાર છે એ. એટલે એકાગ્રતા થાયને, તે શક્તિ તમારામાં જ છે પાછી. આ તો બહાર રૂપક એટલાં માટે મૂકવા પડે કે લોકોને મહીં અંદર છે એનું ભાન નથી, એટલે બહાર મૂકવું પડે છે.
માતાજી, શક્તિ, દેવી, અંબિકા માતાજી, કાળિકા માતાજી, દુર્ગા માતાજી, વગેરેની ભક્તિ કરવાથી પ્રકૃતિ સહજ અને સરળ બને છે. આ બધું પ્રકૃતિને ચોખ્ખી કરવા માટે છે.
આમ, દેવી અંબે માની અત્યંત આદર અને ઉલાસથી ભક્તિ કરવાથી, આપણી પ્રકૃતિ સહજ, શક્તિવંત અને ઊર્જાવાન થાય છે.
અંબેમાની આરતી સાંભળવા અહીં ક્લિક કરો.
subscribe your email for our latest news and events
દાદા ભગવાન ફાઉન્ડેશન, અડાલજ એ આધ્યાત્મિક નોન-પ્રોફિટ ઓર્ગેનાઈઝેશન છે જેનો હેતુ અક્રમ વિજ્ઞાનના આધ્યાત્મિક વિજ્ઞાન દ્વારા આખા જગતમાં સુખ-શાંતિ અને એકતા ફેલાવવાનો છે.
તમારા પ્રશ્નનો અચૂક જવાબ મેળવો
